Kavitha 2016

ప్రతిపక్షి

కిటికీ రెక్కల అద్దం మీద

ఒక గోరింక తన ప్రతిరూపంతో

ఎడతెగకుండా జగడమాడుతుంది

ఆరుబయటికి రమ్మని పిలుస్తుంది

గుచ్చిగుచ్చి ముక్కుతో పొడుస్తుంది

ఎగిరెగిరి కవ్వింపుగా కాలుదువ్వుతుంది

ఆటలో సమవుజ్జీ ప్రతిమాలగా

అంతుచిక్కని గాజులోపల గోరింక కూడ

అచ్చంగా మక్కికి మక్కి తలపడుతుంది

ఇసుమంత సైతం పంతం చెల్లక

ఒకరినొకరు తాకలేకపోయిన వేసటకి

ప్రతిపక్షితో కలసి మాయమవుతుంది

మళ్ళీ పొద్దుపొడువున కొత్తగా

బింబ ప్రతిబింబాల స్పర్శాకాంక్షతో

దర్పణం ముంగిట ప్రత్యక్షమవుతుంది.

Be the first to start a discussion Start a new discussion

Browse all Discussions on Books